أَرَأَيْتَ مَنِ اتَّخَذَ إِلَهَهُ هَوَاهُ

قال الله سبحانه و تعالى فى سورة الفرقان

أَرَأَيْتَ مَنِ اتَّخَذَ إِلَهَهُ هَوَاهُ أَفَأَنتَ تَكُونُ عَلَيْهِ وَكِيلا

أَمْ تَحْسَبُ أَنَّ أَكْثَرَهُمْ يَسْمَعُونَ أَوْ يَعْقِلُونَ إِنْ هُمْ إِلاَّ كَالأَنْعَامِ بَلْ هُمْ أَضَلُّ سَبِيلا

الآيات دى عظيمة قوى لأنها بتوضح ازاى الانسان ممكن هواه يسلسله و يضيعه …ازاى ممكن الانسان يصبح عبد لشهواته و ظنونه و غرائزه…و اسمحولى اضيف كمان ذكريات كاذبة مضللة… ازاى ربنا بيشبه هؤلاء البشر …السمع و البصر و القلب حاجات ربنا مديهالنا عشان نتأمل بيها و نعقل أمور دنيانا عشان نعرف حكم ربنا فيها و عشان نعرف ان كل حاجة بنعملها سواء طيبة او سيئة بتتردلنا ان خيراً فخير و إن شراً فشر …و فى النهاية كلنا لينا رب يحاسبنا …لينا رب حنقف كلنا قدامه مقصرين عرايا …و مع ذلك عندنا أمل فيه …أمل إنه مش ممكن يساوى من يطيعون اهواءهم و ضلالاتهم باللى بيحاولوا يبقوا كويسين …المهم…ربنا بيعطى هؤلاء البشر قيمتهم الحقيقية و بيشبههم بالأنعام …بل إنه سبحانه بيقول عليهم أضل من الأنعام…ليه؟ عشان مش بيحاولوا يصبروا و يتقوا و يحسنوا و بيفضلوا مفضلين السلسلة … أو السلاسل اللى ممشياهم … لأنهم مش بيحاولوا يغيروا من أنفسهم بالرغم من كل الفرص اللى ربنا بيديهالهم …مستسلمين للدنو و رافضين الرقى …مشكلة الشهوات و الغرائز أياً كانت إنها بتعمى و بتؤدى لأخطاء أكبر و أعظم …بتؤدى إلى شريط حياة مكرر ملىء بالحزن و الندم و الاحساس بالذنب و القرف من الحياة لأنها غير كافية و غير منصفة …فى وجهة نظرهم طبعاً…حتى لو أنكر الشخص اللى قدامك …بينه و بين نفسه بيبقى مش مستريح و دايما حاسس إن فى حاجة ناقصة…كلنا بنغلط بس فى ناس بتتشبث بالغلط و بتعتبره طوق نجاة للأسف…المشكلة إنهم مش عارفين إنهم كده…و ساعات بستغرب هو ليه ربنا سايبهم أو مش بيكشفهم قدام الناس …يمكن لحكمته أو لرحمته أو يمكن حيديهم فرص تانية…ربنا مش بيرضى لحد بظلم …يمكن احنا مابنبقاش مدركين فعلا …بس فى النهاية حندرك …يمكن لما نتأمل و نستخدم قلوبنا و عقولنا صح …حندرك… يمكن لما نعرف ازاى حندرك…لما نتأكد إن ربنا يُمهل و لا يُهمِل و إن فى الحياة كما تدين تدان…و اننا كلنا خطائين …و ربنا بيدينا احياناً فرص بس احنا اللى مش بنستغلها و نطيع اهواءنا…حندرك

الاية دى لمستنى قوى مش عارفة ليه…و انا مش بحاول اكون قديسة و لا غيره…انا بس بحاول ادعى ربنا و احنا فى أيام عظيمة زى دى إن ربنا يرحمنا و يهدينا للصح و يثبتنا عليه…و لا يجعلنا من هؤلاء ممن لا يعقلون و لا يبصرون…و يهديهم إذا كان رايدلهم الهداية…آمين