*مجتمعنا بقى مليان جلادين و قضاة…كله بيحكم على كله…كله فاكر إنه صح و مش عايز يسمع التانى …كله بيستغل أى فرصة عشان يبين نفسه العالم ببواطن الأمور من غير وعى و لا أدنى ثقافة …أنت لست معى إذن أنت ضدى…مع إنه لو فكر شوية و حاول يقرب من اللى ادامه ممكن يلاقى نقط تلاقى…مشكلتنا إننا بندور دايماً على الاختلافات…مشكلتنا إن فينا ناس كتير منافقين…قاعدين بس يتكلموا عن الحوار و احترام الفكر الآخر و هما مش بيعملوا كده…و ممكن يوصل الموضوع لسخرية و شتيمة…رافعين شعارات هما مش قدها…لأنهم فى أول فرصة بيثبتوا إنهم مش قادرين يتمسكوا بيها…مشكلتنا إننا بنحاول نفرض رأينا على الآخرين و لو الآخرين ماوافقوش…يبقوا من الآخر مابيفهموش…ماعندهمش القدرة على تحليل المواقف و النظر إليها بمنظور عقلانى…فى حين إن الموضوع كله بيقلب بعبث…و الواحد بدأ بجد يمل و يقرف من الناس اللى زى دى…
*الموضوع كله احساس…لما اللى ادامك يفضل يجرحك و هو مش حاسس إنه بيجرحك…أو مطنش و فاكر إنه بكده هيعلقك بيه أكتر…يبقى ببساطة ما بيفهمكش…ما بيحسكش…يبقى ببساطة مش مهم يكون فى حياتك…العطاء المستمر من طرف واحد مغلوط و بيزود احساس الانسان بضعفه …و الحب و احساسك باللى ادامك مش ضعف… و الشرخ جوايا بيكبر كل يوم و أنا مابقتش مستحملة…و كفاية وجع بقى لحد كده…
* بقيت احس بنفسى بابكى ساعات و أنا نايمة …الدمعة مش لاقية غير الأحلام تنزل فيها…
*ناس كتير بتقولى إن الكلام سهل بس الفعل صعب…إنك يا مروة مثالية و مش حتقدرى تواجهى ترسبات كتير فى حياتنا غلط…المشكلة الحقيقية بقى مش فى كل ده…المشكلة إنى أفقد فى يوم كل الحاجات الحلوة اللى أنا حاساها و مؤمنة بيها…أنا خايفة قوى…خايفة من كتر اللى بشوفه أقع و ماعرفش أنفذ اللى أنا حاساه و أبقى عادية …زى أى حد …و الناس اللى قالوا كده يضحكوا عليا فى الآخر و يقولولى إن الزمن و الناس كانوا أقوى منك…أنا باقى فيا شوية الحاجات البسيطة دى…لو راحوا…حاسة إنى حافقد شعاع الضى البسيط فى حياتى…و الحاجات دى هى اللى بتصبرنى على الدنيا بالرغم من كل الوجع اللى الواحد بيحسه …هو أنا ممكن ابقى كده بجد؟؟… هو ممكن فعلا الدنيا تبقى أقوى منى و القسوة تهزمنى؟؟…طب ساعتها حيبقى فاضل ايه فى الدنيا عشان تتعاش؟؟
مجتمعنا مجتمع فاشل و عمره ماهيعرف يحل اي قضية من قضاياه اللي معذباه من سنين لأنه مريض و سيكوباثي و مقهور .
ردحذفو احنا اتولدنا فيه و دة قدرنا بقى .. هنعمل ايه يا مروة ؟؟
بصي..
انا حاسة بكلامك و بكل حرف فيه جدا جدا ..
مجتمعنا انا لما اعتمدت عليه و راهنت على تقاليده أثبت لي انه مجتمع تعبان اوي .
المصيبة بقى .. ان الناس دي هي السبب في ان المجتمع عامل كدة ..
الناس جاهلة بشكل مخيف الا من رحم ربي..
لا توجد اي ثقافة من اي نوع الا الموروثات و بس ..
اللي هي موروثات جاهلة برضه..
فأي حد عنده أمل في المجتمع دة يلم شنطته و يهاجر أحسن له .. عشان مايضيعش وقته فيه بس و يموت مقهور ..!!
على فكرة حتى الجرح و عدم احترام المشاعر و الاستهانة بيها برضه دي ثقافة .. من ثقافات المجتمع ..!!
مانا عارفة يا شيماء بس الواحد بجد بيتخنق ساعات...و اهه الواحد يفك عن نفسه بكلمتين يعنى :D
ردحذفدماغي لفت و الله من كلامك ، كلنا ف يوم كان جوانا نفس الصراع ده و مع الوقت خدنا نفس الصبغة اللي موجودة حوالينا...
ردحذفكلامك خلاني أشك ف نفسي و ف اسلوب حياتي و تعاملي مع الناس و خايف أكون كده و أسوأ ، لما أتأكد إني أد الكلام ده هرجع للبوست بنفسي و أقول رأيي بقلب جامد...
و أنا منتظرة :)
ردحذف