الفكرة مش ف إنك بعدت مرة واحدة و نسيت …الفكرة إنى كنت بجد محتاجة حد اصدقه…حد استريح له…حد احس معاه إنى حرة و إنى مش خايفة و أنا بقول بحبك…الفكرة إنى كنت محتاجة حد يشاركنى ف حياته زى ما أنا بأتمنه على حياتى…الفكرة إنى دايماً بتمنالك كل خير حتى و انت جارحنى…بفتكرلك مواقف بسيطة فرقت معايا أنا كانسانة…دايما بحاول ابص للجانب الحلو اللى فيك…بس العلاقة كده مش متوازنة…حتى لو كنت انت بتعمل كده و أنا معرفش لازم تقولى…محتاجة اصدق إن فى حد بيعاملنى بجد مش واخدنى هزار أو واحدة يضحك عليها بكلمتين…أو لعبة يرجع لها وقت ما يمل من لعبة تانية…محتاجة احس ان ليا كيان فيك … محتاجة احسك و انت مضايق…و انت بتحلم …و انت بتعافر ف الدنيا…محتاجة احسنى الضمة اللى انت بتدور عليها و بر الأمان…عارف ايه اللى يضحك بجد؟ إن فى بنات كتير تتمنى أى حد يقولها كلمتين حلوين و بتبقى مبسوطة بيهم لأنها عايزة تحس إنها مرغوبة…منتهى احساسى بالحب معاك مش مجرد كلام…محتاجة احس إنى بيتك …عارف معنى الكلمة دى؟ عايزة احس بالأمان …و الأمان بالنسبة لى مش مجرد كلام… عارفة ان البنات دول غريبة …صعب ترضيهم أى حاجة…بس انا مش بتأمر صدقنى…أنا عايزة احسك سند …أنا اصلى بقع كتييييييير قوى…و ساعات بحس إنى نكدية و حساسة زيادة عن اللزوم…عايزاك تكون انت اللى بتمد لى ايديك فى الاوقات دى…عايزاك تقولى انتى مجنونة و انا حفضل جنبك كده عشان انا بحبك و انتى كده…كلك على بعضك بهبلك بعبط بجنانك بمثاليتك…ايوة عايزاك تقول كده و تعمل كده…بس انا مش حتسول منك الحنان و لا الفعل …عشان اللى بيبقى عايز حاجة بجد بيروحلها…بيمسك فيها بكل قوته و بيحافظ عليها…بس أنا معاك مش حاسة إنى حاجة …أى حاجة…بس انت بالنسبة لى حاجات كتير و مهما عملت و لا بعدت اكتر و لا حسستنى انك مش عايزنى ف حياتك أو جبت سيرتى حتى و لو بشرّ…دايما حتمنالك الخير …مش عشان انا ساذجة و لا ضعيفة…عشان الحب قوة …و انا اقوى منك….
الحب لازم يكون فهي جزء من كرامة ..
ردحذفالحب بيحمي الكرامة مابيمسحهاش .. و كلامك دة اقوى دليل على كدة ..
متفهمة مشاعرك للغاية ، و فاهمة كويس جدا يعني ايه احتياج للشراكة ..
و حاسة بالمعنى الحقيقي لكل كلمة اتكتبت هنا ..
بس هاقولك .. ماتبصيش وراكي .. ارفعي راسك بصي لقدام و امشي .. و خدي بالك من خطوتك .
و ربنا يحفظك .
الحب قوة وانا اقوى منك ,,روعه بكل ما للكلمه من معنى ..
ردحذفنعم نحتاجهم بقوة ليكونوا سندنا وقت السقطات
ردحذفنحتاجهم كي نشعر باهميتنا في الحياة
نحتاجهم لاحتياجنا لمن يحتاجنا
نحتاج ان يكونوا سكننا ونكون سكنهم
يكونوا قوتنا وقت الضعف, دمعتنا وقت الحزن, ضحكاتنا البريئة في جنونا, وهمساتنا حين لا نقوي سوي علي النظر الي عيونهم.
ولكن ليس كل ما نلقاه منهم جفاء
فقد تكون الادوار متبادلة والاحتياجات مختلفة
قد لا نفهم مايحتاجونه منا ونطالبهم بما لا يقدرون عليه
صديقتي
كتب علي البعض ان ينتظروا دون انتظارا لنهاية الانتظار
قد نكون منهم وقد نتوهم ذلك وقد يكونوا هم من يتخيلون انهم كذلك
عفوك صديقتي
لا تقسي عليه
قد يكون بمكانك ويصبح اقوي منك لانه يتحمل دون شكوي
وقد تكونين محقة
ولكن صدقيني
للحقيقة اكثر من وجه
.........................
ولكن لا يسعني الا انا ابدي اعجابي باسترسال مشاعرك الجميلة التي كم اثرت في
تحياتي