البنت اللى بتدى كتير و بتعيش التجربة بكل احاسيسها عشان تكتشف بعد كده انها مش البنت اللى ممكن الراجل يحبها… اصلها طيبة و متسامحة زيادة عن اللزوم…اصلها مش بتعرف ترد و بتكتم ف نفسها و تسكت…اصلها عقلانية شوية زيادة…اصلها كل ما حد بيعوزها بيلاقيها…بتمد ايديها و تقدر تكون السند مع انها ف الحقيقة مش مسنودة على حاجة…بتقدر تستوعب حاجات كتير ممكن غيرها مايستوعبهاش…بتقدر تكون محايدة حتى لو كان ده على حساب مشاعرها…البنت دى غير أى حد… لأن كل البنات بتروح و تيجى و هى واقفة ف مكانها مستنية دايما…مستنية حد مش جاى…لأنه لما حيفكر انه يرتبط حيدور على حد تانى…لما ييجى يدور على حد يكتبه… مش حتكون هى الانثى المليئة بالاسرار و الجنون و المشاعر اللى تسمحله ببراح الكتابة و عمق التجربة…حتكون صديقة …حتكون حد بيرتاحله و يصب كل تعبه ف قلبه…بس مش حتكون حاجة تانية…حتكون هى الانسانة اللى ع الهامش دايما… هى البنت اللى ممكن نيجى عليها شوية زيادة…عشان الحبيبة ماتزعلش او تتضايق من وجودها…لأن فى النهاية… البعد عنها مش جارح قوى…مش فارق قوى…سهل قوى!
البنت دى يمكن جمالها مش خارق للعادة …حلوة يعنى …بس جمالها ما يخليش الناس تبص عليها و تقول يا صلاة النبى أحسن! ممكن ما تظهرش قوى وسط ناس كتير…بس لو حد جه يكلمها حتبقى مبسوطة بيه قوى و حتحاول تبين انها متفهمة و مثقفة و…و…و! مع ان اللى ادامها مش حيكون هامه قوى!…البنت دى بتعمل كده عشان بتخاف على مشاعر اللى ادامها…يمكن اكتر ما بتخاف على مشاعرها هى شخصيا…عاملة حساب للتانيين…هما مين؟ مش مهم…ماترضاش لغيرها تكون سبب حزن أو ألم…حتى لو كان فى يوم جرحها…ممكن تدارى على حد بتحبه… اللى هو ممكن فى اقل موقف يتخلى عنها!
البنت دى محتاجة حاجة مختلفة…محتاجة تحس بالامان…و الحنية…هى عارفة كويس ان الشخص اللى حيقدّر كل التفاصيل دى…لسة مش حييجى دلوقتى…لأن واضح ان الزمن ده فيه الاقوى و الملعلع و الظاهر هو المهم…هو اللى بيقدر ياخد اللى هو عاوزه…الفكرة…ان البنت دى مش حاسة انها ضعيفة…بالعكس…هى حاسة انها صح…عمر ما كان الاحتواء و العطاء حاجة ممكن الانسان يستعر منها مثلا…المشكلة اننا بنستضعف اللى بيحبنا بجد و بنعتبر مشاعره شىء مسلم بيه…المشكلة انها مش عارفة حتفضل كده لغاية امتى…مش عارفة اذا كانت حتقدر دايما تدى و تحتوى كتير…حاسة ان مخزونها من الحاجات دى بينقص…و خايفة لما ييجى الحد اللى يستاهلها …تكون بقت زى اى حد تانى…و احساسها يبقى بارد قوى!
مش عارفه اقول ايه عن كلام ده بس اللى اقدر اقوله انى حسيته اوى اوى ومعنديش حل غير الصبر وان مكافاة وتعويض هيجوا بس بالوقت لكن مخزون اللى بينقص دى مش لاقية حل لانه فعلا بينقص وخوف من الاحساس البارد ليسيطر
ردحذف